ಅರ್ಥವಾಗದು

ನನಗೇನೋ ಆಸೆಗಳಿವೆ,ಇತ್ತು
ಇರಬಹುದು, ಇರಲಾರದು
ಹೊರೆತಾಗಿಯೂ ನಾನೆಲ್ಲೂ
ಬೇಡಿಕೆಯನಿಟ್ಟಿಲ್ಲ ಇಡಲಾರೆ
ಜಗತ್ತಿಗೆ ನೂರಾರು ತಲೆಬಿಸಿಗಳಿವೆ
ನನ್ನೊಳಗಿನ ಬಯಕೆಗಳಿಗೆ
ಉಪವಾಸ ಕಲಿಸಿರುವೆ ಬಲವಂತವಾಗಿ.

ನಟಿಸೋಕ್ಕೆ ಬರಲೊದ್ದು ನಟಿಸುವೆನು
ಉಸಿರನ್ನು ಕೊಲ್ಲುವುದು ತಪ್ಪಂತೆ
ನಟನೆಯಲಿ ಉಸಿರುಕಟ್ಟುವಾಗ ಇರುಳಾಗುತ್ತದೆ
ಏಕಾಂತದ ಕುಲುಮೆಗಳು ನನ್ನ ಕಾದಿರುತ್ತದೆ
ಬೆದರುತ್ತಲೇ ಇಳಿದುಬಿಡುತ್ತೇನೆ,ಬೇಯಲು..
ವಿಲವಿಲ ಒದ್ದಾಟ ನಿಮಗೆ ಹಿಡಿಸದು
ಮುಚ್ಚಿಬಿಡಿ ಲೋಕದ ಕದ,ಇಲ್ಲಿ ನಟನೆಯಿಲ್ಲ

ತಪ್ಪುಗಳು ಒಮ್ಮೆಯೇ ನಡೆದದ್ದು
ಶಿಕ್ಷೆ ನಿತ್ಯವೂ ಪುನರಾವರ್ತಿತ,ಇಲ್ಲಿ ನ್ಯಾಯವಿಲ್ಲ
ಬರೆಯ ನೋವು,ಚೀರಾಟ,ಉರಿ,ಕೀವು
ಕೈ ಮುಗಿದು ಬೇಡುವ ಕರುಣಾಜನಕ ಸ್ಥಿತಿಗಳು
ಸಹಾಯ ಸಾಂತ್ವನವಿಲ್ಲ,ಮೊರೆಯೆಲ್ಲ ವ್ಯರ್ಥ
ಮುಗ್ಧವಾಗಿ ಸ್ವೀಕರಿಸುವುದು ಭೀಕರ ಹೊಡೆತಗಳ ತಡೆಯಲಾಗದಾಗ ಹೊರಳಾಡುವುದು,ಅಳುವುದು ಪ್ರಜ್ಙೆಗೆಡುವುದು,

ನಟನೆ ಗರಿಗೆದರುವ ಹೊತ್ತಿಗೆ ಮತ್ತೆ ಸಿದ್ಧ
ಕುಲುಮೆಯಿಂದೆದ್ದ ಕುರುಹುಗಳ ಅಡಗಿಸಿಟ್ಟಿರುವೆ
ಕಂಡರೆ ಮೂಗುಮುರಿಯುತ್ತೀರ,
ಮತ್ತೊಂದು ಶಿಕ್ಷೆ ನೀಡುವುದ ನೆನೆದರೆ ಭಯವಿದೆ
ಚಾಣಾಕ್ಷನಾಗುವೆನು ನಟನೆ ನೈಜವಾಗಿ ಕಾಣಲು
ಸೋಲಿಸದೆ ಸಹಕರಿಸಬೇಕು ಇದ್ದ ಜಗದವರು
ನನ್ನೊಳಗಿನ ಬಯಕೆಗಳಿಗೆ ಉಪವಾಸ ಕಲಿಸಿರುವೆ ಬಲವಂತವಾಗಿ

-ಕಂದ

ೆ